白河歷史答嘴鼓

甲：各位老師

乙：大家平安

甲乙：大家好

甲：阮要開始答嘴鼓 

乙：題目是要講白河  

甲：講若好

乙：請把阮謳咾

甲：講無好

甲乙：請把阮指導

乙：講白河啊說白河   我知不是古早號   古早號做啥碗糕   汝麼把阮說清楚

    不知汝   敢會驚我考

甲：要講要考攏總好   若講白河史   考我考   倒    若是

    白河古早店仔口   風景清幽綠水流   土地肥腴雨水夠   山產農產滿山郊

乙：按呢我問汝

    佇彼設店啥原因   在賣海味或山珍   不是府城抑市鎮   一日可賣幾個銀

甲：無講你不識   講予你識   嘴鬚著好打結   

    因為山產做買賣

    市場設佇茄苳街    中途要過白水溪

    若是平安渡溪過    攏佇店仔吃粿粽、配涼茶

乙：按呢我擱要問汝

    店仔只賣粿、粽、茶   按怎會變店口街

    擱問汝   店主名叫啥麼兮

甲：思當時有一個

    客庄內人名吳根    看見過路人陣陣

    頭殼比人轉較緊    佇彼開店賣物食    擱設斗秤做公親

乙：若按呢講  那ㄟ號做店仔口

甲：汝不知

    買賣熱鬧成市後    街名就是店仔口

    相爭搬徙來茲住    庄頭很緊就廣大

乙：抑擱續落去咧

甲：店仔口街對茲號    沓沓贏過茄苳堡

    因為生理很好做    一直發展遍白河

乙：若照按呢講起來    我要知

    店仔口是古名字    改做白河啥動機

    是為風水或地理    改名又擱於何時

甲：大家講    店仔口    名土倯    上特別是有

    白水溪水水沓沓    溪流圍繞通庄報

    山明水秀風景好    者把庄名號白河

乙：年代佇何時    請汝續講起

甲：若是問年代    我講與汝知

    大正皇帝第九年    官制改革名重編

    街改做庄稱呼變    白河庄名對茲現

乙：彼陣改做白河庄    這陣稱做白河鎮

    又擱改於啥年代    擱是啥原因

甲：庄名改鎮溯    台灣已光復    政府者

    廢除舊制庄改鎮    保甲改做里與鄰

    全鎮分做廿五里    下角減人被廢除

乙：好  好  按呢白河史我明瞭    這陣我要問別條

    聽講白河風景多    特別出名是蓮花

    逐年舉辦蓮花節    講有千千萬萬人

    攏來賞蓮花    參觀詩人會

甲：因為

    白河蓮花美噹噹    白花風流紅花香

    天光中午黃昏暗    出門攏是看花人

乙：喔  白河蓮花美噹噹喔

    這首歌詩很好聽    大家愛唱很有名

    我今開嘴把汝請    請汝唱來大家聽

甲：要聽詩歌無問題    要吟要唱我攏會

    汝若歌詞聽詳細    保證予汝心迷迷

白河蓮花美噹噹    白花風流紅花香

    天光中午黃昏暗    出門攏是看花人

乙：好  好  就是者好聽    者會彼時行 

    好  我擱請問汝    全國詩人會    詩題做啥兮

甲：來  我講予汝聽

    店口懷古限七律    蓮海飄鄉做絕句

    人文風景逐項有    詩詞風雅字字珠

乙：聽講詩作數百首    內容文雅意思優

    汝對詩詞有研究    嗎唸一首來唱酬

甲：無問題  無問題    我就唸詞續吟唱    店口懷古的詩章

    關山嶺下敞平洋    攘昔吳根此結坊

    滄浪採磺延古道    志恆殺賊做沙場

麟屏夕照巒添秀    石室仙蹤跡未荒

紅蝠渺冥紅葉艷    溫泉依舊水流長

乙：唱了好  唱了有夠好  大家打拍仔把汝謳咾

甲：很勞力  很多謝  多謝  把我謳咾  把我褒

接續換我把汝考    蓮海飄香詩    請汝吟好不好

乙：好  好  好

    要吟要唱我攏會    難得今日有機會 

    詩詞我若唸好勢    我用店仔口  古早的駛犁調    獻唱予大家

    十萬遊人百頃蓮    白河荷節盛無邊

    飄香花海風光滿    鎮日徘徊樂欲仙

甲：喔  真正烏矸仔貯豆油    無塊看    按呢會的不講

    予我這個  會在掽風

乙：好哩  好哩    大家互相求進步  好哩

甲：阮的表演已段落   

乙：感謝老師  辛勞

甲：耐心聽阮答嘴鼓

乙：請  多指教

甲乙：予阮會進步

甲：最後我擱要報告    阮的故鄉叫白河

乙：山明水秀風景好

甲：歡迎大家來ㄔ